Scholion Edm. Halleii — De Vocibus Sinus, Nekhohoth & Figura Catha (Latin)¶
Scholion Clarissimi Editoris Edmundi Halleii (Oxford 1758, p. 82)
Scholion Halleii (Halley 1758, p. 82)¶
[§3.3 · Halley 1758, p. 82] Vocem נכחות, qua significat Hebraeus Interpres (Jacob ben Machir) subtensam dupli arcus, sive τὴν ὑπὸ τὴν διπλῆν τῆς περιφερείας apud Ptolemaeum, ubique Sinum reddimus, nostri aevi Mathematicis morem gerentes, & exemplo usi Traductoris Arabis semper vocem جيب, hoc est Sinum, adhibentis. Rationes enim eaedem sunt sinuum quae subtensarum duplorum arcuum inter se.
Porro huic Theoremati tota fere Trigonometria Veterum innititur; nec alio usus est fundamento Ptolemaeus in Syntaxi (Almagest I.13): quod quidem illum à Menelao, vix quadraginta annos seniore, accepisse haud improbabile videbitur, factâ collatione hujus cum Cap. XII. Lib. I. Syntaxeos Mathematicae. Idem Arabibus maxime quoque in pretio fuit, qui, Sphaericorum Triangulorum dimensurationes ex hoc principio petentes, eidem exornando enixe operam dederunt, multisque scriptis Regulam hanc, quam القطاع, hoc est Intersectionis, dixerunt, elucidare conati sunt. Unde Europaei Mathematici ante aliquot secula, cum re nomen etiam à Mauris mutuati sunt, ac de Figurâ Catha scripta reliquerunt; inter quos eminet Simon de Bredon Anglus, circa annum 1350 Mertonensis Socius, cujus de hac re opus in Bibliotheca Bodleiana non uno Volumine asservatur.
Lemmata autem in Codice Hebraeo absque demonstratione assumpta, in Arabico vero ad modum Ptolemaei demonstrata, sic se habent.