Seülen, Vitruvius, Sechs Hobelzierden & Gewundene Kugel-Seüle (Fig. 1–19)

Das dryt büchlein / von den Corperlichen dingen. (Camerarius 1532: Liber Tertius — De columnis, pyramide, horologiis ac litterarum figuris.)

So man aber von dem gantzen bauwerck oder seynen teylen reden will / acht jch es sey keynem berümbten baumeister oder werckman verborgen wie künstlich vnd meysterlich der alt Römer Vitruuius in seinen bücheren von der bestendigkeyt / nutzbarkeyt / vnnd zierden der gebeü geschryben hab / der halb jme auch for anderen zuᵒfolgen / vnd sich seiner ler zuᵒbrauchen ist. So jch aber ytzo für nym ein seülen oder zwo leren zuᵒmachen / für die jungen gesellen / sich darynn zuᵒ vben / so bedenck jch der deütschen gemüt / dann gewonlich alle die etwas newes bauwen wöllen / wolten auch geren ein newe fatzon dar zuᵒ haben / die for nye gesehen wer.

Sechs Grundformen des Hobel- und Drehwerks (S. 085, Fig. 6): Vnd das du wissest was die zierd sey die man mit dem hobel oder drewerck machen kan / so merck das sechserley sunderlicher ding sind / darauß man solichs erbet. Das erst ist ein blatte fassen / das ander ein holkelen / das dryt ein auspogne wellen / das viert ein eck / das fünft ein winckel das sechst ist die schlangen lini / die man mag ziehen wie man will.

Die gewundene Seüle aus umhüllten Kugeln (S. 090–091, Fig. 9–10): Nuᵒn gedenck vnd nym dir für / es sey ein yeklicher punct / in der gewunden axt der seulen ein centrum einer kugel / vnnd reyß darauß auf der selben zwerch lini / darauf der punct der axt stett ein cirkelryß / so dick in dem selbenn ort die gerad seulenn ist vnd thuᵒ das durch all puncten der axt der gewunden seulen. So findt sich der seulen dicke durch all jr krüme / so dann dise cirkel all gemacht sind / als dann far mit einer lini aussen an den zirkelryssen herumb / darauß fint sich der seulen bossen.