Titel & Widmung an Willibald Pirckheimer (Nürnberg 1525)

Vnderweysung der messung / mit dem zirckel vnd richtscheyt / in Linien ebnen vnnd gantzen corporen / durch Albrecht Dürer zuᵒsamen getzogen / vnd zuᵒ nutz allen kunstlieb habenden mit zuᵒ gehörigen figuren / in truck gebracht / im jar. M. D. X X v.

(Camerarius 1532: Alberti Dureri Clarissimi Pictoris et Geometrae Institutionum Geometricarum Libri Quatuor — Praefatio ad Bilibaldum Pirckheimerum.)

Meynem in sonders lieben herren vnd freündt / herrn Wilbolden Pirckheymer / wünsch jch Albrecht Dürer / heyl vnd seligkeyt günstiger herr vnd freündt / man hat byßher in vnsern deutzschen landen / vil geschickter jungen / zuᵒ der kuᵒnst der mallerey gethon / die man an allen grundt vnnd alleyn auß einem täglichen brauch gelert hat / sind die selben also im vnuerstand wie eyn wylder vnbeschnytener bawm auff erwachsen / Wie wol etlich auß jnen durch stetig übung eyn freye hand erlangt / also das sie jre werck gewaltigklich aber vnbedechtlich / vnnd alleyn nach jrem wolgefalle gemacht haben / So aber die verstendigen maler vnd rechte künstner / solchs vnbesunen werck gesehen / haben sie vnd nit vnbillich diser leüt blindtheyt gelacht / die weyl einem rechten verstand nichts vnangenemer zuᵒ sehen ist / dann falscheyt im gemel / vnangesehen ob auch das mit allem fleiß gemalt wirdet / Das aber solche maler wolgefallen in jren yrthumben gehabt / ist alleyn vrsach gewest / das sie die kunst der messung nit gelernet haben / on die keyn rechter werckmann werden oder seyn kan / Das aber jr meyster schuld gewest die solche kunst selbs nit gekündt haben.

Die weyl aber die der recht grundt ist aller mallerey / hab jch mir fürgenomen allen künstbegyrigen jungen / eyn anfang zuᵒstellen / vnd vrsach zügeben damit sie sich der messunge zirckels vnd richtscheyt / vnderwinden vnnd darauß die rechten warheyt erkennen vnnd vor augen sehen mögen … Vnangesehen das itzt bey vns vnd in vnseren zeyten die künst der malerey / durch etliche seer veracht vnd gesagt will werden / die diene zuᵒ Abgötterey / dann eyn yeglich Christen mensch / wirdet durch gemel oder byldnüß als wenig zuᵒ einem affterglauben getzogen / als eyn fruᵒmer mann zuᵒ eynem mord / darumb das er ein waffen an seiner seyten tregt / müst warlich eyn vnuerstendig mensch seyn / der gemel / holtz / oder steyn anbetten wölt / Darumb gemel mehr besserung dann ergernuß bringt / so das erberlich kunstlich vnd woll gemacht ist / In was eren vnd wirden aber dise künst bey den Kriechen vnd Römern gewest ist / zeygen die alten bücher gnugsam an / Wie woll sie nachfolgent gar verloren vnd ob tausent jaren verborgen gewest / vnd erst in zweyhundert jaren wider durch die Walhen an tag gebracht ist worden / Dann gar leychtiglich verlieren sich die künst / aber schwerlich vnnd durch lange zeyt werden sie wider erfunden.